PODA PANGARIRITON SIAN MARTUA RAJA DOLI

Molo naeng mangoli damang sogot, Sotung dioli ho boru ni nambura maduma manang  nambura mamora;  Ai talpe do jolma 
si songon i tu ginjang ni roha!
Alai  oli ma pinompar ni buruk-buruk ni jarango! Ia halak sisongon i:
Butong pe so pola panihal-nihalon, male pe i so pola martuktukhian.

Adong ma najolo na margoar Martua Raja Doli, sada do anakna na margoar si Aji Tuluk. Dung magodang anakna i, disosoi ma ibana mangoli. Alai tung manang beha pe pandasdas ni natorasna asa tung marhasohotan nian anakna i, tong do dang marpangoloion ibana. Jadi didok amana i ma sipaingotna songon on: “Ale amang, dang hatingkian pambahen ni Ompunta Debata di ngolu on, atik andor na jolo jolo tos, manang punggur na jolo jolo madabu. Molo tung di hasuda ni hosanghon nama ho asa marhasohotan, sotung ditopot damang boru ni nambura maduma, manang boru ni nambura mamora!. Ai talpe do jolma si songon i tu ginjang ni roha. Ai molo tarsor halak na pogos marsali tu halak si songon i, sai pintor hatop do i paboa-boanna tu halak na asing. Jala aut sura antar lemba ibana manggarar utangna i, manigor so tartaon do panghuling ni i. Sandok pis do matana maradophon na pogos, jala lea rohana tu angka na dangol. Ai songon i do pangalaho ni jolma, naung sian gambo molo dung tardarat, muba do talmis ni parhata-hatana,” ninna amana.



On pe, molo tung mangalap boru damang sogot, “Oli ma boru ni raja naung leleng mamora manang pinompar ni na mora hian!,” ninna Martua Raja Doli tu anak hasianna i. Ai tung sura pe di laon ni ari gabe marpogos pinompar ni halak si songon i, sai na denggan do i marpangalaho dohot marpanghuling. Jolma si songon i, butong pe so pola panihal-nihalon, male pe i so pola martuktukian. Ai nunga dung dibolus i haraparon dohot habosuron di ngoluna. Udut ni i, ndang haru diharingkothon jolma si songon i be anggo barita ni hamoraon manang hasangapon, alai barita ni uhum na denggan nama si jalahanna. Ndang na pinatupa-tupa be di halak si songon i pambahenan na denggan manang na raja. Ai nunga gabe sada baha (=sifat)  i di nasida, baha raja didok natua-tua. Baha na raja, digombarhon ma i songon tanduk na tubu sandiri di ulu ni ursa rango jala naung pola mardangkai. Laos i do umbahen digoari halak pinompar ni raja na mamora si songon i, “Buruk-buruk ni jarango.” Dos do lapatan ni pandohan i, molo didok: “Molo naeng mangoli damang, alap ma pinompar ni burukburuk ni jarango.” (Jerangau, semakin tua semakin harum)

Ndang sadia leleng nari, marujung ngolu ma Martua Raja Doli. Dung di panading ni amana tamba ma girgir ni inana laho mandasdas ibana asa tung marhasohotan.  Ditangihon ibana do hata ni inana i. Di uji si Aji Tuluk ma hata sipaingot ni amana nahinan taringot tu poda pangaririton, asa tangkas di boto sintong ni poda pangaririton i. 

Jadi dioli ibana ma boru ni nambura mamora. Dung dihalomohon ibana borua i ala toho uli rupana, disauti ma marhite adat. Di mulana i, mansai las do roha ni simatuana i manjangkon helana, ai marningot ibana di hasangapon dohot hamoraon ni Martua Raja Doli nahinan. Ndang manigor di pajae boruna i tu hutana alai laos maringan di bagas ni simatuana i do nasida, sonduk hela.  Si Aji Tuluk pe antong  di hapadothon ma mula-ulaon dohot mangurupi simatuana.
Di sada tingki, songonna mamparhaseang tingki huhut dalan marsaor tu pangisi ni luat i, diihuthon ibana ma donganna sahuta i mardengke, ala mardomu tuk so apala adong ulaon na ronsot siulahononna hatiha i. Ai di sura rohana, nda tung so lomo roha ni simatuana molo dapotan dengke ibana. 

Dung bot ari mulak  ma ibana sian pardengkeanna i diboan ma mansai godang dengke.  Sian las ni rohana dilehon ma dengke i tu simatuana boru. Alai balik do pangkiriman, muruk situtudo simatuana i manjalo dengke i, huhut didok: “Ilanghi dibahen hamu amang hela, so dung hurangan lompan hamu dibagas on. Boasa ma tung pailaonmu hami  marhite parulaanmuna on!” Jadi dialusi helana i ma: “Manangko do iba  da inang maila, matua adat ni sipanganon do buaton! Ulaon mardengke huhilala dang apala sala, tarlumobi ala maruju-uju do. Tung sura pe i diulahon ondop ganup ari, dang apala ulaon hailaan i. Ai ndada adong jolma na marlobilobi sai na hurangan do, jala sai tumabo do na binuat ni tanganniba sian na tinuhor.” “Olo ma da amang hela, marnata do siulaon ni hela ni namora. Ai anggo tung on, tung so suman do on na niulamuna on. Mulai marsogot, di huta sambing ma hamu, molo so ringkot rohamu mula-ulaon,!” ninna simatuana doli manolopi hata ni pardijabuna.
Bornginna i sai manghohom ma si Aji Tuluk mangarimangi parrohaon ni simatuana i. Alai huhut do diparrohahon ibana manang dipature do dengke i bahen lompan nasida. Ba hape dung dilompa, tung i nama gogo ni simatuana i mandalgup dengke na binoanna i. 

Uju dipodoman pe, ro muse ma hata ni na nioli ni si Aji Tuluk: “Ai dang na tingkos di roham solsol ni dainang i? Sar do barita pur alualu, damang on targoar sahalak na mora, hape diula ho mardengke rap dohot angka na so dapot mangan i, nda na pa-ilahon ma ho di nasida,?” ninna. “Botoonhu ma i saulaknari” ninna Si Aji Tuluk. Di naso nok dope matana, ro ma tu rohana; na so adong hape asing ni pingkiran ni simatuana boru tu simatuana doli suang songoni pingkiran ni na niolina. Rap manalahon do diulaon i, atik pe ulaon na denggan i nian.
Hira-hira sadia leleng nari sai gumaleam-galeam ma Si Aji Tuluk di huta, ai dang diboto ulaon dia na umbuk (cocok) tu roha ni simatuana na tau siulahononna. 

Di sada tingki, disangkapi rohana ma naeng mardalani paholangkon langkana sian huta. Sian na so panagaman tarbereng ibana ma adong sangkot bodil ni simatuana di rompeanna (tempat bedil yang dianyam dari rotan). Ala ni i, ditahi rohana ma laho mangiran (berburu dengan cara mengintai) tu harangan na jonok tu huta i. 

Sogot manogot i borhat ma ibana tu pangiranan i. Holan sahali dope dibodilhon, pintor dapotsa ma sada aili na bolon. Dung mulak ibana tu huta, mansai las ma roha ni simatuana i manjalo juhut i. Dipanggangi simatuana i ma juhut i sasanghimpal, disangur ma humaliang huta i. Dipatalmis ma soarana huhut panihal-nihalon mangido lasiak dohot asom dongan ni na pinanggangna i, asa haru diboto na sahuta i nasida na mangan juhut. Sai songon i ma ganup mulak ibana sian pangiranan, sai adong do diboan juhut songon dalan palashon roha ni simatuana i.
Marnida na masa i gabe tubu ma roha ni si Aji Tuluk mangunjuni parrohaon ni simatua na i. Tarsunggul tu rohana poda pangaririton sian amana nahinan: Unang topot boru ni nambura mamora manang nambura maduma! “Antong haru hu-tuluk ma jolo parrohaon ni simatuanghon, asa haru patar binoto manang songondia bagas ni holongna,” ninna rohana.

Marsogotna i, didok si Aji Tuluk ma tu simatuana: “Amang, saulak on dohot ma jolo tungganenghon mandongani ahu marburu.” “Ba na denggan ma i amang hela! Holan on sipaingothu asa jagahon hamu  laemuna i, manat-manat hamu mamodil,!” ninna simatuana i. “Olo amang” ninna helana i, laos borhat ma nasida. 
Dung sahat nasida  di harangan, dipajuju  ma biangna sigompul marunung-unung manghehe ursa i. Dang pigadan, ruar ma ursa naung martanduk mardangka-dangka sian ingananna. Manigor ditengen si Aji Tuluk ma huhut dipulhon (ditembakkan) bodilna. Hona apala toho di parate-atean ni ursa i laos galpang. Dang mangguit be!
Marsurak ma tungganena i sian las ni rohana. Jadi didapothon nasida ma hadabuan ni ursa i. Dung i didok si Aji Tuluk ma: “Molo talapa ursaon lae, dang tarporsan hita nadua on sahali mamboan tu huta. Ala ni i, laho ma jolo ahu mangalapi halak amanta tu huta, asa adong donganta mamboan juhut on.” Alai jolo dipauli si Aji Tuluk ma sada pansapansa, asa adong inganan parlinggoman ni tungganena i manjaga ursa i, tipak dibahen  marsopo.  “Na denggan ma i lae, alai hatop ma hamu ro sian i,!” ninna tungganena i. 
Dung i laho ma ibana mulak tu huta, ditadingkon ma tungganena di pansa na pinaulina i. Alai dung mandapothon harbangan ni huta i, dipaula ibana ma mangangguk badar songon on ma didok: “Amang, amang oi amang…. sapot ni nipinghon! Amang.....nunga mate laenghu hubodil, hurimpu ursa!” Sai songon i ma ibana mangangguhi, jala sai dipangompas-ompashon ma dagingna. 
Dung dibege simatuana hata na mandok naung mate anakna i, hehe ma ibana sian jabu ditiop ma  hujur mangalojong helana i, huhut didok: “Ingkon mate di tanganhu ma ho ale anak ni asu..., tagonan do anakhu na sasada i sian ho!”
Marnida rimas ni simatuana i, maporus ma si Aji Tuluk dung sai di lelei simatuana doli, simatuana boru dohot jolmana i ibana. Ai huhut do masitiop ompong-ompongna be nasida laho mamunu si Aji Tuluk. Sai sumurut ma ibana dompak harangan hapeahan ni ursa i. Alai dung lam donok nasida tu hamatean ni ursa i, deba alani gaor ni jolma i, longang jala jou-jou ma tungganena i sian pansa i ninna ma: “Angguk boha do i ale! Ise do hamu na gaor i…??”
Umbege soara na jou-jou i, manghohom ma na torop i manangihon soara i. “Rupa soara ni si anu do i..! na rupa mulak mangolu do ibana hulaning?” angka ninna be. Jadi di pahatop nasida ma mandapothon soara na jou-jou i. Dung sahat angka na torop i di hamatean ni ursa i, gabe di ida nasida ma dakdanak i na toho paadop-adop ursa na bolon, dang na toho hape mate! Jadi tarhatotong ma nasida mida pangunjuni ni hela di simatuana i. Alai dung dianto (dipahami)  pambahenan ni helana i, maila ma simatuana i huhut disolsoli di rohana angka panghulingna naung sanga salpu. Alai didok helana i ma: “Olo amang, sinahe ma jolo ursa on, asa mulak hita tu huta! Annon pe hita torang manghatai dung sahat di huta.
Disahe nasida ma ursa i jala diparlehon ma bagian ni ganup na ro. Dung i mulak ma nasida. Ditingki na mardalan i nasida, dirimangi rohana ni si Aji Tuluk ma hasisintong ni poda ni amana nahinan, na mandok: “Na so siolion boru ni nambura mamora dohot nambura maduma, songon on ma hape partorangna,” ninna rohana dibagasan.
Jadi dung sahat nasida di huta, didok si Aji Tuluk ma hatana: “Gomgom hamu ma borumu jala paulak hamu ma sinamot naung jinalomu.!  Ai ndang adong hape holong ni rohamu di ahu. Aut na tutu hape mate laenghi binahen ni ha-otoonhu nang pe ala ni na so hutuntun, na ingkon pamateonmuna do hape baoadi. Aut adong hata pangampinon sian borumuna i, adong dope na gabe sirimangan, hape tung dohot do ibana mamboan lombut-lombut naeng mamunu ahu. On pe gabe ma borumuna i tu anak ni halak !” ninna si Aji Tuluk huhut diboan nasa ugasanna sian bagas ni simatuana i. Borhat ma ibana mandapothon inana tu bagas ni Martua Raja Doli nahinan.
Dung sirang si Aji Tuluk sian boru ni nambura mamora i, tarsolom mata ma ibana  muse tu sahalak namarbaju na uli rupana. Dung dipamanat dang apala na mora nian leakna, alai halak na maduma do. Ditopot ibana ma muse boru ni nambura maduma i bahen parsondukna. 
Suang songon pangalahona di tingki di bagas ni nambura mamora nangkin do dibahen pangalahona di bagas ni nambura maduma i; mardengke dohot marburu. Alai tung so adong do imbarna tu parrohaon ni simatuana nuaeng dohot simatuana na parjolo i. Sian i pe laos sirang boti do anak ni Martua Raja Doli.
Asa dung sirang baoa ondeng sian boru ni nambura maduma i, ditopot ma muse boru ni raja naung leleng mamora, alai anggo nuaeng nunga humurang be hamoraonna. Dung marujung langkana di si, diula ma ulaon hapadoton; parumaon rodi pardengkeon. Las situtu do roha ni simatuana marnida pangalaho ni helana i, jala sai las do roha ni simatuana i ganup manjalo dengke na sian tangan ni helana i molo uju laho ibana mardengke. Di ulahon helana i do huhut parburuon. Ganup ro ibana sian harangan, sai adong do diboan ursa manang hije. 
Di sada tingki di unjuni helana i ma simatuana i songon on; Di boan ma tungganena tu pangiranan, jala dibodil nasida ma sada ursa ranga na bolon. Dung mate ursa i, dipauli ma pansa songon naung pinajojor ondeng, dung i mulak ma ibana tu huta. Alai dung mandapothon harbangan, dibahen ma ibana songon na mangangguki didok ma: “Sapot ni nipinghon, ale inang! nunga mate laekhu hubodil, hurimpu ursa!” ninna.
Dung ditanda simatuana i soara ni helana i, didapothon ma tu harbangan jala ditangkasi ma aha na masa. Dung dipajojor helana i pangalaho ni na masa i, didok simatuana i ma: “Hahuaon ma i ale amang,! naung i do ari ni laemi pangatur ni Debata di ibana, ingkon bodil mamusa ibana. Apala ha-pillitan pambahen ni Debata taringot tu hamatean ni jolma. Nuaeng pe, pasip damang ma !  “Apala tarpaihut andor na mangolu tu andor na mate” Naung dua hian hamu anak di jolonghu, hape nuaeng ingkon sada nama pa-adop-adoponhu. On pe, paboa marama marina laemi beta hamu ma ta-alap bangkena i asa tipak tatanom!
Mansai lambok situtu do panghilalan ni helana i umbege hata ni simatuana i. Jadi laho ma nasida tu hamatean ni ursa i, alai anggo helana ondeng tong do dipaula sai mangangguhi, so olo apulan ni simatuana i.
Dung sahat nasida di hamatean ni ursa i, di ida simatuana i ma na so toho hape mate anakna i, baliksa pa-adop-adop ursa na bolon do. Marnida i, muruk situtu ma  simatuana i, didok ma: “Boasa ma pola songon i bahenon ni damang tu hami! Pola sampe sindak mudarnami dibahen hamu! Tarpasuang hamu do ilu-ilu ni simatuamu boru i dohot ilu-ilu ni borunghi?  Nang tung sura na tutu mate laemuna i, ba dia ma si dohononnami tu hamu...! Tung tar-paihut hami ma na mangolu tu naung mate? Dao ma i.!  I pe mulak ma hita, taboan ma ursa on asa gira ni upa hamu dohot laem di huta!”
Dung i disahe nasida ursa i, mulak ma nasida tu huta. Dung sahat nasida di huta, dijomput simatuana i ma parbue tu simajujung ni ianakhonna na dua i, papir tondina. Dibuat ma pinahan lobu na bolon bahen manghopol tondi nasida. Olat ni i, lam tu dengganna ma parsaripeon ni si Aji Tuluk songon i nang tu simatuana i. Gabe ma nasida, maranak marboru sahat ro di na mauli bulung.


0 Response to "PODA PANGARIRITON SIAN MARTUA RAJA DOLI"

Posting Komentar